Success Stories
കടക്കെണിയിലായ ടെലികോം സേവനദാതാക്കളായ വോഡഫോൺ ഐഡിയയിൽനിന്ന് തങ്ങളുടെ ഓഹരികൾ വിറ്റൊഴിയാൻ കേന്ദ്ര സർക്കാർ ഒരുങ്ങുന്നതായി റിപ്പോർട്ട്. ഇതിനായി പുതിയ നിക്ഷേപകരെ കണ്ടെത്താനുള്ള ശ്രമങ്ങൾ ഊർജിതമാക്കാൻ കമ്പനിയോട് സർക്കാർ ആവശ്യപ്പെട്ടിരിക്കുകയാണ്. ആഭ്യന്തര തലത്തിലും അന്തർദേശീയ തലത്തിലും നിക്ഷേപകരെ കണ്ടെത്താനാണ് നിർദ്ദേശമെന്നും ദ് ഇന്ത്യൻ എക്സ്പ്രസിന്റെ റിപ്പോർട്ടിൽ പറയുന്നു.
ഇന്ത്യൻ വംശജൻ സ്ഥാപിച്ച ഒരു അമേരിക്കൻ നിക്ഷേപ ഫണ്ട് വോഡഫോൺ ഐഡിയയിൽ താൽപര്യം പ്രകടിപ്പിച്ചിട്ടുണ്ട്. ടെലികോം മേഖലയിൽ പ്രവർത്തന പരിചയമുള്ള ഇന്ത്യൻ കമ്പനിയുമായി കൈകോർത്ത് വോഡഫോൺ ഐഡിയയിൽ നിക്ഷേപം നടത്താനാണ് ഇവർ ആലോചിക്കുന്നത്. നേരത്തെ രണ്ട് പ്രമുഖ ഇന്ത്യൻ കോർപറേറ്റ് ഗ്രൂപ്പുകളും കമ്പനിയിൽ നിക്ഷേപം നടത്താൻ സന്നദ്ധത പ്രകടിപ്പിച്ചിരുന്നു. എന്നാൽ കമ്പനിയുടെ ഭാവി സംബന്ധിച്ച ആശങ്കകൾ നിലനിൽക്കുന്നതിനാൽ, നിക്ഷേപകരെ കണ്ടെത്താൻ കൂടുതൽ വിപുലമായ തിരച്ചിലിനാണ് സർക്കാർ മുൻഗണന നൽകുന്നത്.
സർക്കാരിന്റെ ഓഹരി പങ്കാളിത്തം
2025 ഫെബ്രുവരിയിൽ കമ്പനിയുടെ പലിശ കുടിശ്ശികയ്ക്ക് പകരമായി സർക്കാർ വോഡഫോൺ ഐഡിയയുടെ 49 ശതമാനം ഓഹരികൾ ഏറ്റെടുത്തിരുന്നു. ഇതോടെ കമ്പനിയിലെ ഏറ്റവും വലിയ ഓഹരി ഉടമയായി സർക്കാർ മാറി. വോഡഫോൺ ഗ്രൂപ്പിന് 16.07 ശതമാനവും ആദിത്യ ബിർള ഗ്രൂപ്പിന് 9.5 ശതമാനവുമാണ് നിലവിൽ ഓഹരി പങ്കാളിത്തമുള്ളത്. പുതിയ നിക്ഷേപകൻ എത്തുന്നതോടെ സർക്കാർ തങ്ങളുടെ ഓഹരികൾ വിൽക്കുകയും നിയന്ത്രണം പുതിയ നിക്ഷേപകന് കൈമാറുകയും ചെയ്യാനാണ് പദ്ധതി. ലാഭകരമായ നിരക്കിൽ ഓഹരികൾ വിൽക്കുക എന്നതാണ് സർക്കാരിന്റെ ലക്ഷ്യം.
കടബാധ്യതകളും സർക്കാർ നൽകിയ ഇളവുകളും
ഏകദേശം 2 ലക്ഷം കോടി രൂപയുടെ വലിയ കടബാധ്യതയാണ് വോഡഫോൺ ഐഡിയയ്ക്കുള്ളത്. ഇതിൽ പ്രധാനമായ ഒന്നാണ് അഡ്ജസ്റ്റഡ് ഗ്രോസ് റെവന്യൂ കുടിശ്ശിക. 87,695 കോടി രൂപയുടെ ഈ കുടിശ്ശിക തിരിച്ചടയ്ക്കുന്നതിന് അഞ്ച് വർഷത്തെ സാവകാശം സർക്കാർ അടുത്തിടെ നൽകിയിരുന്നു. സ്വകാര്യ നിക്ഷേപകർ മുന്നോട്ടുവെച്ച പ്രധാന നിബന്ധനകളിലൊന്നായിരുന്നു ഇത്. ഈ ഇളവ് ലഭിച്ചതോടെ കമ്പനിയുടെ സാമ്പത്തിക സ്ഥിതിയിൽ നേരിയ പുരോഗതിയും നിക്ഷേപകർക്ക് കൂടുതൽ വ്യക്തതയും ലഭിക്കുമെന്ന് പ്രതീക്ഷിക്കുന്നു. 2032 മുതൽ 2041 വരെയുള്ള കാലയളവിൽ ഈ തുക തിരിച്ചടയ്ക്കാനാണ് അനുമതി നൽകിയിരിക്കുന്നത്.
എന്തുകൊണ്ട് വി നിലനിൽക്കണം?
ഇന്ത്യൻ ടെലികോം മേഖല റിലയൻസ് ജിയോ, ഭാരതി എയർടെൽ എന്നീ രണ്ട് കമ്പനികൾ മാത്രമായി ചുരുങ്ങുന്നത് ഒഴിവാക്കാൻ വോഡഫോൺ ഐഡിയയുടെ നിലനിൽപ്പ് അനിവാര്യമാണെന്ന് സർക്കാർ കരുതുന്നു. ഉപഭോക്താക്കൾക്ക് മെച്ചപ്പെട്ട സേവനം ലഭിക്കുന്നതിനും വിപണിയിൽ മത്സരം നിലനിർത്തുന്നതിനും ഒന്നിലധികം കമ്പനികൾ ഈ മേഖലയിൽ ആവശ്യമാണ്. വോഡഫോൺ ഐഡിയ ഒരു ശക്തമായ കമ്പനിയായി നിലനിൽക്കേണ്ടത് രാജ്യത്തിന്റെ ഡിജിറ്റൽ മേഖലയ്ക്ക് പ്രധാനമാണ്.
നിലവിൽ സബ്സ്ക്രൈബർമാരുടെ എണ്ണത്തിൽ ഇടിവ് നേരിടുന്നുണ്ടെങ്കിലും, സർക്കാരിന്റെ പിന്തുണയും പുതിയ നിക്ഷേപകരുടെ വരവും കമ്പനിക്ക് ഒരു വലിയ ഉത്തേജനം നൽകുമെന്നാണ് പ്രതീക്ഷിക്കുന്നത്. വരും മാസങ്ങളിൽ പുതിയ നിക്ഷേപകരുമായുള്ള ചർച്ചകൾ നിർണായകമാകും.
Content Highlights: Vi seeks investor to enable Govt exit; US-based fund eyes domestic tie-up